Dewis Ceiropractydd

Ein rôl ni yw sicrhau canlyniadau gwell i’n cleifion. Fodd bynnag, rhan hollbwysig o brofiad cyffredinol y claf yw sicrhau ein bod yn gweithio gyda chleifion ac yn eu trin yn ddiogel.

Elisabeth Angier, Clinig Ceiropracteg Dyffryn Gwy

Ynglŷn â cheiropractyddion

Mae ceiropractyddion yn weithwyr iechyd proffesiynol cymwys sy'n gallu asesu, gwneud diagnosis a thrin ystod eang o gyflyrau, megis poen cefn a gwddf, mân anafiadau chwaraeon a chlunwst.  

Gall triniaeth ceiropracteg fod yn fuddiol am nifer o resymau;  lleddfu symptomau poen ac anesmwythder, gwella  symudedd a lleihau  anabledd sy'n gysylltiedig â phroblemau cyhyrau a chymalau.

Sut y gall ceiropractydd eich helpu chi

Mae ceiropractyddion wedi'u hyfforddi i ddefnyddio amrywiaeth o dechnegau wrth drin eu cleifion. Maent yn fwyaf adnabyddus am ddefnyddio dulliau gofal â llaw, gan gynnwys trin asgwrn cefn a chymalau (a elwir hefyd yn ‘addasu’) ond gallant hefyd ddefnyddio dulliau ymarferol eraill neu ddulliau â chymorth offeryn.

Bydd llawer o geiropractyddion hefyd yn darparu cyngor ynghylch ffordd o fyw ac ymarferion i'ch helpu i reoli'ch cyflwr. Gallai hyn gynnwys cyngor dietegol a maethol yn ogystal â strategaethau i reoli straen ac anghysur.

Cyn dechrau triniaeth, bydd ceiropractydd yn asesu'ch symptomau i benderfynu a yw triniaeth ceiropracteg yn briodol i chi a'ch cyflwr, a pha dechnegau sydd fwyaf tebygol o wneud hynny. Mae ceiropractyddion wedi'u hyfforddi i nodi pan na fydd triniaeth ceiropracteg yn helpu cyflwr meddygol a byddant yn gwneud atgyfeiriad i'ch Meddyg Teulu neu weithiwr gofal iechyd proffesiynol arall, os oes angen. 

Dewis Ceiropractydd

Mae ceiropractyddion yn weithwyr gofal iechyd proffesiynol rheoledig. Er mwyn ymarfer yn y DU, mae'n rhaid i geiropractydd fod wedi'i gymhwyso ac wedi'i gofrestru gyda'r GCC. Mae'n anghyfreithlon i unrhyw un ddisgrifio'i hun yn geiropractydd heb fod wedi'i gofrestru gyda'r GCC. 

Wrth ddewis ceiropractydd, mae'n hanfodol eich bod yn gwirio i sicrhau eu bod wedi'u cofrestru gyda'r GCC.

Gallwch wneud hyn trwy ddefnyddio ein peiriant chwilio Dod o Hyd i Geiropractydd .

Yn olaf, er bod rhai ceiropractyddion yn cynnig gwasanaethau drwy'r GIG, mae'r rhan fwyaf yn gweithio yn y sector preifat.  Mae hyn yn golygu y byddwch yn gyfrifol am dalu costau triniaeth, naill ai'n breifat neu drwy eich yswiriwr iechyd. 

Nesaf: Eich ymweliad cyntaf i weld ceiropractydd (yr asesiad cychwynnol)