Gwneud yn fawr o’ch gofal parhaus

Beth fydd y ceiropractydd yn ei wneud?

Yn ystod y driniaeth, bydd eich ceiropractydd yn dewis technegau penodol â llaw neu dechnegau â chymorth offeryn i wella'ch cyflwr. Byddant yn esbonio'r holl dechnegau hyn, gan gynnwys gosod dwylo ar eich corff. Fodd bynnag, os oes gennych unrhyw gwestiynau neu os hoffech eglurhad pellach, gofynnwch.

Tynnu dillad

Yn dibynnu ar y driniaeth sydd ei hangen arnoch, efallai y bydd y ceiropractydd yn gofyn i chi dynnu eitemau penodol o ddillad. Os felly, byddwch yn cael gwybod ac, os oes angen, yn cael gŵn i'w wisgo. Os nad ydych yn gyfforddus ynghylch dadwisgo, siaradwch â'ch ceiropractydd. Byddant yn eich cynghori ar ddillad addas i'w gwisgo i'w galluogi i'ch archwilio a'ch trin.

Ar unrhyw adeg, gallwch ofyn i aelod o'r teulu neu drydydd person fod yn bresennol yn ystod y driniaeth.

Faint o sesiynau ceiropracteg y bydd eu hangen arnoch chi?

Bydd nifer y sesiynau'n amrywio yn dibynnu ar eich cyflwr a sut mae'r driniaeth yn datblygu. Fodd bynnag, dylai'ch ceiropractydd allu rhoi syniad i chi o nifer y triniaethau y gallai fod eu hangen arnoch.

Mae'r rhan fwyaf o gleifion yn gweld gwelliannau yn eu cyflwr ar ôl ychydig o sesiynau triniaeth. Os na sylwch ar welliant, bydd eich ceiropractydd yn trafod opsiynau gofal eraill neu'n ceisio'ch atgyfeirio i weithiwr gofal iechyd proffesiynol arall.

Gallwch benderfynu rhoi'r gorau i driniaeth ar unrhyw adeg. Ni fydd disgwyl i chi dalu am driniaethau nad ydych wedi eu derbyn.

Cyngor ynghylch ffordd o fyw

Bydd llawer o geiropractyddion yn hapus i ddarparu cyngor ynghylch ffordd o fyw ac ymarferion i'ch helpu i reoli'ch cyflwr. Gallai hyn gynnwys cyngor dietegol a maethol yn ogystal â strategaethau i helpu i reoli straen.

Beth fydd yn digwydd os na fydd fy nghyflwr yn gwella?

Os ydych chi'n teimlo nad yw'ch cyflwr wedi gwella o fewn ychydig wythnosau i ddechrau'r driniaeth, dylai'ch ceiropractydd drafod opsiynau gofal posibl eraill neu wneud atgyfeiriad  i weithiwr gofal iechyd proffesiynol arall.

Gyda'ch caniatâd, bydd eich ceiropractydd yn darparu copïau o'ch cofnodion claf i weithiwr iechyd proffesiynol arall yn manylu ar y triniaethau rydych wedi'u derbyn. Gallwch hefyd ofyn i'ch ceiropractydd am gopi o'ch cofnodion.

Trin cyflyrau cymhleth

Gall y rhan fwyaf o gleifion ddisgwyl gweld gwelliannau o fewn ychydig wythnosau o ddechrau triniaeth ceiropracteg. Fodd bynnag, efallai y bydd angen cynllun gofal estynedig ar gleifion â chyflyrau cymhleth, hirdymor neu sy'n ailddigwydd, yn dibynnu ar ba mor gyflym y maent yn ymateb i driniaeth.  

Nesaf: Cwestiynau Cyffredin